Rev 8 | MHL | STEP | Aria Sipsip Muuka-ke tana opowa murarow akena nain teekeya wi iinan owow maa muutitik oram muutarep ikomakemik, uuwunowa marew, maa kuru-karanowa marew. Yo furewam-na lawisiw eeyarek.

Revelation of John 8

1 Aria Sipsip Muuka-ke tana opowa murarow akena nain teekeya wi iinan owow maa muutitik oram muutarep ikomakemik, uuwunowa marew, maa kuru-karanowa marew. Yo furewam-na lawisiw eeyarek. 2 Naap ikok feenap urufam, wi ensel ikur okaiwi-pa erup Mua Maneka miir onoma-pa wiar iimarep ikemik. Wi nain puuwa wiiwkin opap ikemik. 3 Wi nan ikaiwkin ensel oko-ke kererek. O gol amina gelemuta opap ekapep Mua Maneka patirow esimsa miimowa-pa iimarek. Esimsa nain Mua Maneka miir onoma-pa wiar ikua. O foma ikin eliwa nain kerew akena iwemik, wi Mua Maneka teeria o faremi wiena opora o nokarem-ikaiwkin gol esimsa neeke kuumemi Mua Maneka patirominok naep. 4 Foma nain-ke awemi wi Mua Maneka teeria o farimik nain wiena opora kawus ikin eliwa onaiya Mua Maneka wiar urupok. 5 Nain onap weesereya mukun oposia esimsa iinan-pa aawep amina-pa iparep-puap miiwa-pa sawikeya nain kuisow arek. Naeya aapereka wilinemi paranek ne maa ofofona onaiya miiwa-pa imenarek.

Puuw aluowa

6 Aria maa muutitik nain weesereya ensel ikur okaiwi-pa erup nain puuw fuuru naep fakeramik. 7 Ensel miimowa-pa ikua nain-ke onoma wuak. Ona puuw fuureya ipia mokok mane-maneka ne mukuna, aka onaiya bilik aremi ipia saarik orok. Oromi miiw ara arow ikua nain miiw ara kuisow kuumok, koka, nomokowa, miiw ara arow-pa ikua nain kame kuisow kuumok ne sipira enuma urupem-ikua nain pun iiwawun awomakek.

8 Nain weesereya ensel oko-ke ona puuw fuureya maa oko ema maneka saarik nain-ke awemi ifera-pa orok. Oromi ifera kame arow ikua nain kame kuisow aka arek. 9 Ne kame nain mera ne ifer maa muutitik nain iiwawun umomakek. Ne aasa pun naap, kame nan ikemik nain iiwawun samoraromakek.

10 Ne aria ensel oko-ke puuw fuurak. Fuureya mokom maneka pusunep parina onaiya iwami miiwa kame arow nain kuisow-pa oromi eka opora ne eka arona iiwawun samorak. 11 Mokoma nain unuma Eka Mafua naimik. Mokoma nain-ke eka masialoweya mua enep umemik.

12 Naap ikok ensel oko-ke ona puuw fuurak. Fuureya ama kame okaiwi samorarep me wilinek, siiwa ne mokoma pun naap. Umeya okaiwi kuisow ikua nain parina epa maala me ekak, epa kokomarowa ewurarek. 13 Ne aria yo iinan mokakem-na saragum maneka-ke iinan-pa birinemi farem-ikua, “Oo emawa, ni miiw mua, nefa komarka! Ensel arow puuw me fuurowa ikemik. Wi puuw fuuriwkin, wiisak, ni kamenap baurarowen?”